భారతీయ రైల్వేలో ప్రయాణికులు చెల్లించే టికెట్ ధరకు, వారి ప్రయాణానికి అయ్యే వాస్తవ ఖర్చుకు మధ్య భారీ వ్యత్యాసం ఉంది. 2023-24 ఆర్థిక సంవత్సరంలో ప్రయాణికుల రవాణాపై రైల్వేకు వచ్చిన ఆదాయం కంటే ఖర్చు రూ.60,466 కోట్లు అధికంగా ఉంది. సగటున ప్రయాణికులు తమ ప్రయాణానికి అయ్యే అసలు ఖర్చులో 45 శాతం తక్కువే చెల్లిస్తున్నారు. ఓ సుదూర ప్రయాణ రైలు జనరల్ బోగీలో విపరీతమైన రద్దీ. తండ్రి మోకాళ్ల మధ్య ఇనుప ట్రంకు పెట్టె.. పదేళ్ల కుమారుడు కిటికీ పక్కన కూర్చుని బయటకు చూస్తున్నాడు. బంధువుల పెళ్లికి వెళ్లేందుకు ఆ కుటుంబం ఉదయం టికెట్లు కొనుక్కుంది.