प्रक्रिया केलेल्या सांडपाण्याचा पुनर्वापर, पावसाच्या पाण्याचे संधारण, भूजल पुनर्भरण आणि स्थानिक जलस्रोतांचे पुनरुज्जीवन यांसारख्या पर्यायांचा अभ्यास केला जाणार आहे. पुणे : पुणे महानगर प्रदेशातील वाढते नागरीकरण, औद्योगिकीकरण आणि लोकसंख्येमुळे भविष्यात निर्माण होणारी पाण्याची गरज लक्षात घेऊन राज्य सरकारने पुढील २५ वर्षांच्या जलव्यवस्थापनाचा बृहत आराखडा तयार करण्याचा निर्णय घेतला आहे. यासाठी जलसंपदा विभागाने अभ्यास गटाची स्थापना केली असून, निवृत्त सचिव अविनाश सुर्वे यांची या गटाच्या अध्यक्षपदी नियुक्ती करण्यात आली आहे.