नांदेडमध्ये नादुरुस्त कालव्याचे पाणी शेतात घुसले; सुपीक जमीन खरडून गेल्याने बळीराजा संकटात! नांदेड : जिल्ह्यात एकीकडे तीव्र पाणीटंचाईचे सावट गडद होत असताना दुसरीकडे अधिकाऱ्यांच्या निष्काळजीपणामुळे लाखो लिटर पाणी अक्षरशः वाया जात असल्याचा संतापजनक प्रकार अर्धापूर तालुक्यातील कामठा शिवारात उघडकीस आला आहे. पूर्णा प्रकल्पाच्या कालव्यात कचरा अडकल्याने पाण्याचा प्रवाह कालव्याबाहेर वळला आणि थेट शेतांमध्ये घुसला. यामुळे शेकडो हेक्टरवरील पिकांचे नुकसान झाले असून जमिनीचीही मोठ्या प्रमाणात धूप झाली आहे.