ராமநாதபுரம் நகராட்சி கூட்டத்தில், பல ஆண்டுகளாக சாலை வசதி செய்து தராததைக் கண்டித்து, நகராட்சி ஆணையர் மற்றும் அதிகாரிகளின் காலில் விழுந்து கவுன்சிலர் ஒருவர் கெஞ்சிய சம்பவம் பெரும் பரபரப்பை ஏற்படுத்தியுள்ளது. ராமநாதபுரம் நகராட்சி அலுவலகக் கூட்ட அரங்கில், நகர்மன்றத் தலைவர் கார்மேகம் தலைமையில், ஆணையர் கண்ணன் முன்னிலையில் மாதாந்திர கூட்டம் நடைபெற்றது. கூட்டத்தில் தமிழ்த்தாய் வாழ்த்து பாடி முடிக்கப்பட்ட அடுத்த கணமே சபையில் பரபரப்பு தொற்றிக்கொண்டது. 9-வது வார்டு திமுக கவுன்சிலர் டி.சி. நாகராஜ் திடீரென நகராட்சி ஆணையர் மற்றும் அதிகாரிகளின் காலில் நெடுஞ்சாண்கிடையாக விழுந்தார்.