ప్రకృతి ప్రకోపం విరుచుకుపడినప్పుడు భారీ వృక్షాలు వేళ్లతో సహా నేల కూలడం సాధారణం. ఆ తర్వాత వాటిని రంపాలతో ముక్కలు చేసి కట్టలుగా మార్చడం అంతకన్నా పరిపాటి. కానీ, పశ్చిమగోదావరి జిల్లా తణుకు పట్టణంలో ఇందుకు భిన్నమైన, ఆదర్శప్రాయమైన దృశ్యం ఆవిష్కృతమవుతోంది. ఇటీవల సంభవించిన 'అర్నబ్' తుపాను బీభత్సానికి నేలమట్టమైన వందేళ్ల నాటి మహావృక్షాలకు అక్కడి యంత్రాంగం, పర్యావరణ ప్రేమికులు కలిసి శాస్త్రీయ పద్ధతిలో మళ్లీ ప్రాణం పోస్తున్నారు.