ఛత్తీస్గఢ్లో కబ్రా కాన్ అనే అడవి ఏనుగు ప్రజలకు కంటిమీద కునుకు లేకుండా చేస్తోంది. గత ఆరు నుంచి ఏడు నెలలుగా ఈ ఏనుగు దాడుల్లో 16 మంది ప్రాణాలు కోల్పోగా, మరికొందరు గాయపడ్డారు. సుమారు 3 వేల కిలోల బరువున్న ఈ 20 ఏళ్ల ఏనుగును పట్టుకునేందుకు అటవీశాఖ భారీ ఆపరేషన్ చేపట్టింది. ఏకంగా 100 మంది అటవీ సిబ్బంది, ముగ్గురు పశువైద్యులు, రెండు శిక్షణ పొందిన కుంకీ ఏనుగులు, డ్రోన్ల సాయంతో దాని కదలికలను గుర్తిస్తున్నారు. అయితే, ఇతర ఏనుగుల గుంపులో కలిసిపోవడంతో దానిని గుర్తించి మత్తుమందు ఇచ్చి పట్టుకోవడం అధికారులకు సవాలుగా మారింది.