విమానంలో ప్రయాణిస్తున్నప్పుడు చిన్న కుదుపు వచ్చినా ప్రయాణికులు ఆందోళన చెందుతారు. అలాంటిది విమానాశ్రయంలోనే రెండు భారీ విమానాలు ఒకదానికొకటి ఢీకొంటే పరిస్థితి ఎలా ఉంటుంది? అమెరికాలోని మయామీ విమానాశ్రయంలో ఇలాంటి అనూహ్య ఘటన చోటుచేసుకుంది. రన్వేపైకి వెళ్లేందుకు సిద్ధమవుతున్న రెండు విమానాలు ట్యాక్సీవే వద్ద ఢీకొన్నాయి. విమానం ముక్కు భాగం నలిగిపోయిన దృశ్యాలు ఇప్పుడు సోషల్ మీడియాలో వైరల్ అవుతున్నాయి. అమెరికాలోని ఫ్లోరిడా రాష్ట్రం మయామీ అంతర్జాతీయ విమానాశ్రయంలో శనివారం రాత్రి ఈ ఘటన జరిగింది. యూపీఎస్ (UPS)కు చెందిన బోయింగ్ 767 కార్గో విమానం, కోపా ఎయిర్లైన్స్కు చెందిన బోయింగ్ 737 ప్రయాణికుల విమానం ఒకదానికొకటి ఢీకొన్నాయి.