పాకిస్థాన్లో ఉగ్రవాదుల ఏరివేతకు భద్రతా బలగాలు భారీ ఆపరేషన్ చేపట్టాయి. రెండు ప్రావిన్సుల్లో ఏకకాలంలో ఉగ్రవాదుల స్థావరాలపై విరుచుకుపడ్డాయి. దీంతో భద్రతా బలగాలు, ఉగ్రవాదుల మధ్య భీకర ఎదురుకాల్పులు చోటుచేసుకున్నాయి. ఈ కాల్పుల్లో ఏకంగా 24 మంది ఉగ్రవాదులు హతమయ్యారు. అయితే ఈ ఆపరేషన్లలో నలుగురు పాకిస్థాన్ సైనికులు కూడా ప్రాణాలు కోల్పోయారు. మృతుల్లో ఓ మేజర్ స్థాయి అధికారి ఉండటం గమనార్హం. బలూచిస్థాన్, ఖైబర్ పఖ్తున్ఖ్వా ప్రావిన్సుల్లో ఈ ఘటనలకు సంబంధించిన వివరాలను పాకిస్థాన్ సైన్యం బయటపెట్టింది.