రైల్వే ట్రాక్ పేలుడు కేసులో రోజుకో సంచలన విషయం వెలుగులోకి వస్తోంది. ప్రేమ, డబ్బు ఆశ చూపి సోషల్ మీడియా ద్వారా యువతులను, ముఖ్యంగా ఒంటరి మహిళలను లక్ష్యంగా చేసుకుంటున్న పాకిస్థాన్ ఏజెంట్ల కుట్ర బయటపడింది. ప్రేమ పేరుతో పరిచయం పెంచుకుని, ఆ తర్వాత వారిని ఉగ్ర కార్యకలాపాలకు ఉపయోగించుకుంటున్నట్లు దర్యాప్తు సంస్థలు అనుమానిస్తున్నాయి. రాజస్థాన్లోని శ్రీగంగానగర్ రైల్వే ట్రాక్ పేలుడు ఘటనలో ఇద్దరి అరెస్టుతో ఈ కుట్ర కోణం వెలుగులోకి వచ్చింది. నవంబర్ 3న రాజస్థాన్లోని అనూప్గఢ్-సూరత్గఢ్ రైల్వే లైన్పై పేలుడు ఘటన చోటుచేసుకుంది.