జిల్లాలో రహదారులపై రక్తపు ధారలు పారుతున్నాయి. సరదాగా.. సంతోషంగా ఇంటి నుంచి బయటకు వచ్చినవారు అటు నుంచి అటే తిరిగిరాని లోకాలకు వెళ్లిపోతున్నారు. అంతవరకు తమవెంటనే ఉండి మాట్లాడుతూ ఉన్నవారంతా రెప్పపాటు సమయంలో జరిగిన ప్రమాదంలో విగతజీవులుగా మారిపోతున్నారు. కళ్లముందే అయినవారిని, నేస్తాలను పోగొట్టుకున్న వారు గుండెలు పగిలేలా రోదిస్తున్నారు. ఒక్క ఎస్.రాయవరం మండలంలోనే రెండు రోజుల వ్యవధిలో మొత్తం అయిదుగురు ప్రాణాలు కోల్పోయారు. శనివారం ముగ్గురు మృత్యువాత పడటం స్థానికంగా విషాదం నింపింది. ఎస్.రాయవరం మండలం గుడివాడ శివారు కొత్తపోలవరం వద్ద విద్యుత్తు స్తంభాన్ని కారు ఢీకొన్న ప్రమాదంలో మరో యువకుడు మృతిచెందాడు.