నందమూరి ఫ్యామిలీకి తెలుగు చిత్ర పరిశ్రమలో ప్రత్యేకమైన గుర్తింపు ఉంది. దివంగత నటుడు ఎన్టీఆర్ మొదలుకొని ఆయన వారసుల వరకు ఎంతోమంది ఈ కుటుంబం నుంచి హీరోలుగా పరిచయమయ్యారు. ముఖ్యంగా నందమూరి బాలకృష్ణ తనదైన నటన, మాస్ ఇమేజ్తో కోట్లాది మంది అభిమానులను సంపాదించుకున్నారు. ఎన్నో వైవిధ్యమైన పాత్రల్లో నటిస్తూ నాలుగు దశాబ్దాలకు పైగా ప్రేక్షకులను అలరిస్తున్నారు. ఫ్యాక్షన్ సినిమాలతో బాలయ్య సృష్టించిన ప్రభంజనం అంతా ఇంతా కాదు. సమరసింహారెడ్డి, నరసింహనాయుడు, చెన్నకేశవరెడ్డి వంటి చిత్రాలు ఆయన కెరీర్లో ప్రత్యేక స్థానాన్ని సంపాదించుకున్నాయి. ఇప్పటికీ వరుస సినిమాలతో ప్రేక్షకులను అలరిస్తున్న బాలకృష్ణ.. ఇటీవల డాకు మహారాజ్తో మరో విజయాన్ని అందుకున్నారు.