జపనీస్ అనిమే ప్రపంచానికి భారత్లోనూ భారీ సంఖ్యలో అభిమానులు ఉన్నారు. ముఖ్యంగా ‘బ్లీచ్’, ‘నరుటో’, ‘యు యు హకుషో’ వంటి సిరీస్లను ఇష్టపడే ప్రేక్షకులకు ఓ గుడ్ న్యూస్. ప్రముఖ జపనీస్ అనిమే సిరీస్ ‘బ్లీచ్’ డైరెక్టర్ నోరియుకి అబే హైదరాబాద్కు రాబోతున్నారు. అంతేకాదు.. భారతీయ క్రియేటర్లు రూపొందించిన ఒరిజినల్ అనిమే కథలను స్వయంగా పరిశీలించి విజేతలను ఎంపిక చేయనున్నారు. నవంబర్ 14న హైదరాబాద్లో ప్రారంభం కానున్న అనిమే ఇండియా వేడుకల్లో ఈ ప్రత్యేక కార్యక్రమం జరగనుంది. ప్రపంచవ్యాప్తంగా గుర్తింపు పొందిన అనిమే దర్శకుడు నోరియుకి అబే హైదరాబాద్కు రానుండటం అనిమే అభిమానుల్లో ఆసక్తిని పెంచుతోంది.