અમદાવાદ શહેરમાં વાયુ પ્રદૂષણની સ્થિતિમાં મંગળવારે સોમવારની સરખામણીએ આંશિક સુધારો નોંધાયો છે. સોમવારે શહેરનો સરેરાશ એર ક્વોલિટી ઈન્ડેક્સ 200ના આંકડા સુધી પહોંચી ગયો હતો, જે મંગળવારે ઘટીને 167એ પહોંચતાં નાગરિકોએ રાહતનો શ્વાસ લીધો હતો. જોકે, શહેરના કેટલાક વિસ્તારોમાં હજુ પણ હવાની ગુણવત્તા ચિંતાજનક સ્તરે પહોંચેલી છે. સમગ્ર અમદાવાદમાં સૌથી વધુ ભયજનક સ્થિતિ ગોતા વિસ્તારમાં જોવા મળી હતી, જ્યાં AQIનું પ્રમાણ 220 નોંધાયું છે, જે સ્વાસ્થ્ય માટે હાનિકારક માનવામાં આવે છે.