ದೆಹಲಿ: ಮುಖ್ಯ ಚುನಾವಣಾಧಿಕಾರಿ ಜ್ಞಾನೇಶ್ ಕುಮಾರ್ ರಾಜೀನಾಮೆಗೆ ಆಗ್ರಹಿಸಿ ಕಾಂಗ್ರೆಸ್ ನೇತೃತ್ವದ ಒಕ್ಕೂಟ 'ಇಂಡಿಯಾ' ಹೋರಾಟ ತೀವ್ರಗೊಳಿಸಿದೆ. ದೆಹಲಿಯ ಜಂತರ್ ಮಂತರ್ನತ್ತ ಬುಧವಾರ ತೆರಳಲು ಮುಂದಾದ ಕಾಂಗ್ರೆಸ್, ವಿಪಕ್ಷ ಸಂಸದರಿಗೆ ಪೊಲೀಸರು ತಡೆಯೊಡ್ಡಿದಾಗ ನಡುರಸ್ತೆಯಲ್ಲಿ ಹೈಡ್ರಾಮಾವೇ ನಡೆಯಿತು. ಸಂಸದೆ ಪ್ರಿಯಾಂಕಾ ವಾದ್ರಾ ಅವರು ಸಂವಿಧಾನದ ಪ್ರತಿ ಹಿಡಿದು ಕೆಲವು ಮಹಿಳೆಯರ ಜೊತೆ ರಸ್ತೆಯಲ್ಲೇ ಮಲಗಿದರು, ಲೋಕಸಭೆ ವಿಪಕ್ಷ ನಾಯಕ ರಾಹುಲ್ ಗಾಂಧಿ ಅವರು ಸಹೋದರಿಗೆ ಬೆಂಗಾವಲಾಗಿ ನಿಂತರು. ಬಳಿಕ ಪೊಲೀಸರು ರಾಹುಲ್ ರನ್ನು ದರದರನೆ ಎಳೆದೊಯ್ದರು. ಪ್ರಿಯಾಂಕಾರನ್ನು ಹೊತ್ತೊಯ್ದು ಜಾಗ ತೆರವುಗೊಳಿಸಿದರು.